مابيتنسوش (د/محمود ابو الزم - ياسين البلسم )

في الشارع الضيق أوي
يمكن تحس ان البيوت
هي ّ اللي ولدت بعضها
وتلاقي شباك كل بيت
ماسك في شبابيك الجيران بيعضــّها
مكسوفة من بعض البيوت
لو في السما....حبة سحاب اتجـّـمعوا
شكل السحاب بيخضـَـها
جدرانها تبدأ ترتعش
وتداري طولها في عرضها
خايفة المطر....ينزل يدوّب سترها
ويبيـن الحزن اللي هاتك عرضها
في الشارع الضيق اوي
فيه ناس كتير
هربانة..أو...متهرّبة
مدّربة
إزاي تعيش وسط انكسار...وماتنكسرش
إزاي تعيش في الذكريات....وما تفتكرش
و إزاي بترضي بلقمة ناشفة وحتتين طرشي جزر
ولا إنــّها
من مال غلابة تربّي كرش
و إزاي وهي ّ مافيش في جيبهااا.. قرش ساغ
لازم يعيش جوة القلوب معني الشرف
مع إنه مابيعملشي قرش
و إزاي يسوقهاااا كل شئ
علشان تموّت نفسها....وما تنتحرش
في الشارع الضيق أوي
صوت طرطشة مية حـُما الواد ابراهيم
يخرق ودان كل الجيران
والكل فرحان ليه عشان
الأخ هيما من زمان
كان ناسي ايه طعم الحـُما
كان كل يوم
يرجع من البنزينة لابس بدلته....متشحمة
كالعادة دايما ً ينسى يقلع جذمته
يدخل ينام زي القتيل
أو ربما
فعلا ً قتيل
يصحي من النوم الطويل
من غير مراية يحط جل على العمي
بس المهم يحط جل
مع إنها نفس الهدوم...متشحمة
يمشي بعينيه المكسورين
و كإنها ...ممنوعة تحلم بالسما
وبرغم دا
بيعلـّـمك معني الرضا
ساعة ما ما مرسيدس جديدة تفوت عليه
ساعة ما يملي تانكها
دخانها بيعفــّر عليه
لحظتها بس عيونه تضحك للسما
ويلاقي صوت جوّاه يقول
أرزاق وفوق....متقسمة
في الشارع الضيق أوي
حنفية واحدة للجميع
حمام موّحد للجميع
والضحكة واحدة للجميع
والدمعة واحدة للجميع
الهم واحد في القلوب
فيه شئ غريب بيصعبّه ...ويهوّنه
إنه بيسكـُـن.... في الجميع
في الشارع الضيق أوي
هتشم ريحة غريبة جداً تدهشك
وتخربشك
ريحة عرق
على ريحة الحبر اللي مسجون في الورق
على ريحة الحلم اللي مـ ِالقلب اتسرق
مع صورة عايشة على الجدار
لمحمد اللي اختار يسيب
الشارع الضيق أوي
ويروح بعيييييييييييييييييد
لكن محمد للأسف
الحلم في البحر اتنسف
علشان محمد لمّا خاف
مـ ِالجوع يموت ...مات بالغرق
في الشارع الضيق أوي
فيه ناس غلابة كتير أوي
بيسَنــّدوا اليوم الطويييييييل....علشان يفوت
ويعلموك
إزاي تموت من غير ما احساسك يموت
و يخلوا قلبك يسألك
ساكنة البيوت جوة البشر
ولاّ البشر جوة البيوت؟
و إزاي جميع كتب الحساب والهندسة
فشلت تحل إزاي يعيش ألفين نفر
في بيوت آخرها 200 يادوب
ومايعرفوش إن البشر
في الشارع الضيق أوي
فعلا ً بيوتهم ضيقة
بس الوَسـَع جوة القلوب
في الشارع الضيق أوي
الناس بحالها بيسألوا
فيه زحمة ليه واستعدادات
فيه إيه جري....ليه شقوا جدران السُـكات
طلع الرئيس و ذوي الفخامة والسّمُــو
هيعدّوا بكرة من هنا
رايحيين هناك...في الشارع الواسع أوي
فيه افتتاح متحف جديد
وقصور قديمة اتجددت
وهتتفتح من تاني في العصر الرشيد
لكن أكيد
لو عدّوا ممكن يلمحوا
الشارع الضيق أوي
أو ريحته ممكن تزكم الجمع السعيد
إيه يعلموه
في الشارع الضيق أوي
علشان عن العين يحجبوه
أو يدفنوه
ملعون أبوه
لو كان يوحـّـش اسم مصر
يصْحَـي البشر
في الشارع الضيق أوي
يلقوا على ناصية شارعهم سور كبير
عالناحيتين
مكتوب في وشه بخط يبْسط كل عين
الحي بيرحب أوي بالزائرين
مكتوب في ضهره بخط يجرح كل عين
من بكرة لازم كلكم تـِخلـُــوا البيوت
من بكرة فيه..قرارات إزالة لكل بيت
و ابكي براحتك لو بكيت
لو لسه فيه في عيونكوا دمع
أو لسة فيه لدموعكوا عين
طب ليه وإمتي...إزاي...منين
ومافيش جواب
و يصرّخوا
ليه تحبسونا فـ حلمنا
طب فهمونا عملنا ايه
خلاكوا سيبتونا في عذاب
والله ما سرقنا البلد
ولا جينا ناحية حلمها
مع إنه بإيدينا اتولد
متأسفين
على ايه ما نعرفشي إنـّما متأسفين
يا موكب الجمع السعيد
يااللي جايين تتفرجوا
على مصر مصر ماهيش هناك
مصر اللي عايزينها هنا
محبوسة ويانا هنا
الصبح تاكل لقمة حاف
بالليل تنام من غير لحاف
و نقع تشيلنا في قلبها
وتقع نشيلها على الكتاف
ونخاف عليها من الهوي..مع إنها
ما بقيتشي دلوقتي علينا خلاص تخاف
يا موكب الجمع السعيد
إمتي تهدّوا السور هنا
وتهدوا وياه ألف سور
بانيينه من طوب حزننا
عايزين نعيش زي البشر
أو حتى مش زي البشر...لكن نعيش
راضيين بمصر بحزنها
وبدمعنا...وبدمعها
لو فيها قوتنا....أو مافيش
يمكن حياة الحلم جوانا انتهت
لكن أكيد
حلم الحياة مابينتهيش
ياموكب الجميع السعيد
حوّد هنا
يمكن مافيش
في شارعنا متحف ولاّ قصر
لكن قلوبنا بتوعدك
في الشارع الضيق أوي
هتلاقي مصر

سعيد جدا بعودتي للحارة
مابيتنسوش هي قصيدتي الجديدة على مدونتي
http://journy-to-myself.blogspot.com/
د/محمود سليمان ابوالعزم...ياسين البلسم

هل تلعب معي ؟ (مهندسة ريهام زينهم)

وجلست انتظر الحديث
مرت قرونٌ منذ اخر كلمتين بيننا
والعمر يسبق في الرحيل مدامعي

لازلت اذكر حين اهداني الدُمي
- ذاك الفتي -
لازلت اذكر لعبة الثعبان والأوراق
لازلت اذكر كيف تؤرق سندريللا مضاجعي
لم تنته القصه ولم ابغ النعاس
لازال صوتك حين تُلقي كل ابيات القصيد العذب
يُطرب مسمعي
لازالت الأشعار تكتبها واحفظها مع الأيام
انقي مراجعي

وقد انتهي عصر الأحاديث الشقية بيننا
ما عدت انت ولا انا
والصمت يجثم كالقبور علي منابع وحينا

هل تبقي عيناك - علي مر العصور - مشعةً ببريقها؟؟
هل نبقي نمرح..؟؟ رغم هذا الحزن يثقل مُقلها
هل تبقي صوره من ليال طفولتي وبرائتي
تمحو الأنين من المعاني ودمعها؟؟

في مثل ليلتنا وفي ذات المكان
- من عمر مضي -
اعلنت َ انك لن تعود لملعبي
تنفرج منك الشفتان علي شفا همس طفيف
امسكتُ كرتي – قُرب قلبي – ضممتها
ووضعت فوق الشفتين اصابعي
وهمستُ..هل تلعب معي..؟؟..

نهى (ناعومي) منتدى قراطيس

هى
رحلة طويله بين الضدين
وشوارع احلام مشتركه
وخطاوى اختلفت سكتها
وفراق ف الاخر
مش مقصود

بنت
عيونها بتخدك مسافات
وجدايل روحها الطفله
تتسرسب زى الشمس
من الشباك
وتطل على البرد بروحك
فتطمن كل المتعرى
بفعل الازمات
.....
تتقلب زى فصول السنة
الصيف جواها نسيم مخنوق
والشتا بردان بهموم روحها
معجونه طيبتها
بسيف العند
فتقول لاء.. بكبر المشتاق
وتقدم ورده
فى وسط التلج
تتدربك روحك وياها
ازاى الاعصار يتحول طفل؟؟!ّ
............
نهى
اوراق جواباتك
ومشاعر بنت العشرين
والورد اليامه المتحنط
لساهم متشالين
جوا اوضه ف قلبى
وبيسالونى ساعات
اخبار نهى ايه
بعد التلاتين
.....

يتم (ناعومي)

عارف

لما بتيجى ف بالى

وبحس ان انا وانت ف زحمه
مش معروف لاخرها حدود
ولا مفهوم ازاى هنكون
والعالم بيشد اتجاهتنا
شمال..وجنوب
وبيقسى
على خيط الصبر الملضوم
بالحلم ال مستنى اشارة
....
لما بتيجى ف بالى
وبحس ان العشق مابينا
رحلة عمر قصير جدا
حلم جنين
نبضه الخافت
بيقول عايش
وهيتحمل رفض الكون
لكن غدر اللحظه الاولى
بتلف على النبض العاشق
فيموت ف ميلاده
مخنوق
.....

لما بتيجى ف بالى

بنوتة احلامنا الحلوه
واعرف ان حبيبتى النونو
طعم الفرح المحذوف منى
مش هتعيش غير حلم ف ورقه
وعيونها اللى بلون ايامى
مش حتشوفنا
ولا هتدمع لما احكى لها
عن حكياتنا
..
على اوراقنا
ينفع نرسم سهم لفوق
يحضن جنبه سهم لتحت
لكن مش مسموح بالمره
اننا نرسم وسط دموعنا
ارض وسما
عاشق معشوق

......

قلبي بيضحك (رام وناعومي) منتدى قراطيس

قلبي
تحت غيطان الهم
كيان منبوذ
مش كل الأهل بيتحبّوا
لما قابلت امبارح عمي
ماوقفتش اسَلِّم
هزيت له دماغي وعَدِّيت
مش كل حيطان الحلم امان
لكن بشقاوة نور و روان
حمادودو بيضحك من قلبو
ببراءة سنتين من عُمْرو
تملا الفرحة عيوني
والدمعه تفِر
وباعتِّب مصطبة الماضي
وامسِّي عليه
وبأدوَّر وشي الناحية التانية
عشان انساه
واتكدَّر
لما الحلم يطُول من غيرك
واستناك
وأما تخطي جبال مُحَالاتك
تخطب وِدّْي
قلبي بيضحك



ردت ناعومي وقالت

قلبى وقلبك فاهمين بعض
نفس الصوره اترسمت فيا
مش كل الاهل بيتحبو
ولا يتصاحبو ف لحظة هم
عمى مراته سالت عنى
علشان بس تفكر امى انى كبرت
واكبر واحد كان جوايا
رن موبايلى كتير على بابه
لكن مغلق خط القلب
وحشنى صحيح
بس الظاهر ان احساسنا لساه ساذج
زى سذاجه ضحكة جوجو
لما تقولى
مش راح تيجى ؟؟؟
هاتى معاكى عروسة جديده
توكة لشعرى صفرا وحمرا
ويلا بسرعة
بلمس دمعه تبل الضحكه
واقول معلش
هى الفرحه لازمها الصحبة
ف طلة عيد
بس ان غابت
ممكن برضه الفرحه تجينا
حتى ان داخت ع المواعيد

http://www.qratees.com/vb/showthread.php?t=7561

مش باحبك (ريهام زينهم)

إهداء:
مش بحبك
أو بحبك
فارقه إيه..؟؟

وإحنا بنعدي الإشاره
لمسه كانت بين كفوفنا
تدي ميت مليون (100.000.000) أماره
فيها إيه مسكة إيديا
إلا إحساس بالأمان...؟؟
نظرة الخوف اللي وقفت
فوق عيونك
لما ودوني العياده
لما قالوا تعبت فجأه
واترميت ع الأرض بأصرخ
وإنت جري حضنتني
لو ف الخيال
وأما جيت طمنتني
* إن شالله انا
قبلِك مفيش
بعدِك ماينفعش إني أعيش
من غير وجودك
كل حاجه ما تساويش
ضمة الحاجب بأخوه
لما بألبس لبس ضيق
غيرَه منك
وللا ضحكه من قلوبنا
لما بأتدلع عليك
نبض خوفنا يوم لنبعد
رعشتي لكلمة ( حبيبتي)
والأوامر للحاجات الصح دايماً
وأما أكشّر
فوق ودان الأرض أدبدب
مش عاجبني
* ربي ما يأمّر عليكي حد ظالم
بأبتسم طاعه ومحبه
مش مبرر وللا عَشره (10)
لو بحبك
مش بحبك
فارقه ايه..؟؟
ليه بتربط بيننا كلمه
واللي بيننا
أقوي من كل الكلام
بيننا عِشره

**********

الاختيارات من منتدى قراطيس وحارة زعتر
qratees

يالى متخبى ف ضلوعك
وف ضلوعك الف ممكن
كان حيمكن
بس وقعت
كام حقيقه مداريه
شخبطه ف فهرس مشاعرك
زى تخريفة خريفك لما يسكن
عمر فايت بالمواجع
واللى واجع روح بتعشق
دندنات لغروب مسافر
والبعيد ع القلب يخفى
لو يشيل كل اللى صبنا من اهاته
تصبح الضحكه اللى ماتت
روح بتغزل ذكرياته
والشهور التسعه تكمل
تكتمل لحظه مخاض
صرخة اولى وروحنا تايهه
صرخة تانيه دموع مهاجره
صرخة تيجى بالسكات
والهدوء يصنع شباكه
طعمه مر الاحتمال
صيد مفاجىء للى فارق
طعم خوفه
واللى بالاحساس تمرد
عاش جنونه وسط (جايز)و(احتمال)
من ضلوعه يهرب المسجون بامره
واللى خابط كل وجعه ف حيط مشاعر
ينتشى بلحظات محال
كركبات الذكريات تصبح معادله
جمع الاطراف ف ناحيه
واطرح الخوف اللى دربك عمق قلبك
تلقى كل الرحله صدقا
صفر/صفر !!


دكتورة ناعومي

صفر/صفر